Leikasavnið
Á Býarbókasavninum ber til at lána leikur. Lánitíðin er 1 mánaða. Ikki ber til at endurnýggja lánið, tá ið tú lænir leikur.
Leikurnar eru dygdargóður leikur, ið lúka ES-krøvini fyri leikur til børn.
Her fæst eitt nøkurlunda yvirlit yvir leikurnar, ið eru. Eisini ber til at leita í leititeiginum eftir leikum. Tíverri eru ongar myndir. Hetta tí heimasíðan er nýggj, og alt enn ikki er komið uppá pláss. Men tit eru vælkomin at lána fyri tað.
Fyri at lána leikur, kanst tú bíleggja á okkara heimasíðu, og tá fært tú eini boð, tá ið leikan er klár at heinta. Eisini ber til at koma famvið, og spyrja eftir leikuni.
Meira um Leikasavnið
Føroya fyrsta almenna leikasavn læt upp á Býarbókasavninum í Havn 15. Juni 2018.
Leikasavnið er partur av átakinum: Grøna leiðin, sum er sett í verk sambært umhvørvispolitikkinum hjá Tórshavnar kommunu, har greið mál eru sett um økta býtisnýtslu. Ein arbeiðsbólkur hjá kommununi umboðandi Býarbókasavnið og Umhvørvisdeildina mentu verkætlanina.
Dentur er lagdur á at keypa inn dygdargóðar leikur, ið lúka ES-krøvini fyri leikur til børn.
Tað er Náttúru- og umhvørvisnevndin hjá Tórshavnar kommunu, sum fíggjar Leikasavnið, ið er eitt samstarv millum Býarbókasavnið og Umhvørvisdeildina.
Børn og avvarðandi í Tórshavnar kommunu hava tikið væl ímóti hesum tilboði.