Ungdómsbókasavnið

Tey ungu hava sítt egna bókasavn á Býarbókasavninum.

Leingi hevur verið tørvur á, at ungdómurin fær meira pláss og betri umstøður á Býarbókasavninum, og í september 2022 lat ungdómsbókasavnið á 2. hædd loksins dyrnar upp. Á ungdómsbókasavninum hava tey ungu umsíðir fingið sítt egna stað, eitt bókasavn, sum er serliga innrættað til teirra.

Ungdómsbókasavnið er eitt innbjóðandi stað, sum gevur teimum ungu íblástur, møguleika og umstøður at vera á bókasavninum. Umframt at hava eitt gott úrval av ungdómsbókum á bæði føroyskum, donskum og enskum, hevur ungdómsbókasavnið eisini teknirøðir, pláss at spæla borðspøl, lesikrókar og góðar lestrarumstøður.