Skaldsøga. Alt skal hava sína tíð. Tol skal til, seiggi og áhaldni. Tvær hendur við einum haka og einum eyrhakkara. Hvat skulu tær formáa sær at gera nakað við tað, ið liggur soleiðis, sum skaparin einaferð hevur lagt tað? Men so við og við hefti eygað seg við, at broytingar komu í. Longu annað summarið vóru fleiri grasgrønir teigar at síggja. Og í grønu fløtuni vóru smálutir í onkrum øðrum grønum litum. Tað vóru eplaveltir og kál.