Anton er lækni og arbeiðir í Afrika fyri ein hjálparfelagsskap, men heim hansara er í Danmark, so hann ferðast ímillum. Munurin á ógvusliga gerandislívinum í afrikansku flóttafólkaleguni og tí vakra og friðarliga danska smábýnum er øgiligur, og tað hevur sjálvsagt sína ávirkan.
Hjúnalagið kollsiglir, og Anton og konan, Marianne, skulu nú venja seg við at liva uttan hvørtannað, og tað er ikki so lætt. Tey eiga tveir synir, og tann eldri, 12 ára gamli Elias, fær um somu tíð ein nýggjan vinmann, Christian. Hetta heldur óvanliga vinalagið fær avleiðingar fyri tey øll og hóttir við at oyðileggja lívið í friðsæla býnum.

Hetta er ein filmur um stóru spurningarnar í lívinum, um tað ónda og tað góða, um rætt og rangt.
Susanne Bier er kendur danskur filmsleikstjóri, og hetta er nýggjasti filmur hennara, sum hevur fingið nógv rós og fleiri virðislønir, seinast Oscar-virðislønina fyri besta útlendska film 2011.

Hævnen (2010). 1 tími 53 minuttir.

Er filmurin tøkur?

18 ára gamla Maja, sum er tjúkk og klossut, droymir um at vera kendur sjónleikari. Í bygdini, har hon gongur í studentaskúla, er hon við í einum bólki av ungum sjónleikarum, men hon fær aldrin høvuðsleiklutin, tí hon hevur ikki røttu útsjóndina. Hini eru eisini bara við til stuttleika, meðan tað er ramasti álvari hjá Maju.
Erika, sum hevur gingið á filmsskúla, droymir um at sláa ígjøgnum við einum dokumentarfilmi, men  tað einasta, hon sleppur at filma, er brúdleyp.

Tá ið Erika og Maja hittast í einum brúdleypi, har Erika filmar, fær Erika hugskotið til at gera ein dokumentarfilm um Maju, og Maja heldur, at nú verður hon endiliga uppdagað. Erika flytir inn við sínum upptøkutóli, og alt, sum Maja sigur og ger, verður filmað.
Men veit Maja veruliga, hvat hon er farin í holt við, og ætlar Erika bara at útnytta og útstilla hana?

På vei mot stjernene (svenskur tittul: Prinsessa) (2008). 1 tími 30 minuttir.

Er filmurin tøkur?

Frú Sommers, sum býr á eini oyggj í Ermarsundi, hevur verið einkja, síðan maðurin doyði í falklandskrígnum. Hon eigur eina dóttur, sum lesur í London, og tá hon hoyrir um yvirgangsálop í býnum, roynir hon at fáa fatur á dóttrini, men til fánýtis. At enda verður hon noydd at fara til London at leita, men har valdar ruðuleiki, tí nógv fólk leita eftir avvarðandi, og hon varnast skjótt, at dóttirin ikki hevur sagt henni alla søguna um lív sítt í stórbýnum.

Í London hittir frú Sommers Ousmane, sum er svartur og muslimur og býr í Fraklandi. Hann leitar eftir soninum, sum hann ikki hevur sæð, síðan hann var heilt lítil. Hóast frú Sommers og Ousmane hava heilt ymiska bakgrund, eru tey felags um vónina og vónloysið, og bæði fara ígjøgnum upp- og niðurtúrar, meðan tey leita eftir børnunum.

Filmurin er stjórnaður av fransk-algeriska leikstjóranum Rachid Bouchareb og fekk Silvurbjørnina við filmfagnaðin í Berlin í 2009.

London River (2009). 1 tími 25 minuttir.

Er filmurin tøkur?

Filmurin fer fram í Suðurafrika, stutt eftir at Nelson Mandela er vorðin forseti. Tjóðin er sundurbýtt, og Mandela skal royna at sameina fólkasløgini. Rugbylandsliðið hevur verið fyri nógvum ósigrum, og nevndin ger av at skifta liðskipara. Heimsmeistarakappingin stendur fyri durum, og Suðurafrika er vertur fyri kappingini.
Forsetin ger ikki mætari enn at bjóða nýggja liðskiparanum at vitja seg, og her ger hann honum greitt, at hann hevur stórar vónir fyri landsliðnum.

Rugby hevur verið ítróttin hjá teimum hvítu burturav, men nú er høvi at gera tað til eina ítrótt fyri alt fólkið. Vitjanin fær stóra ávirkan á unga liðskiparan. Hann sær ein sterkan Mandela, sum hóast nógvan mótburð bert ynskir at fyrigeva og hyggja frameftir, so Suðurafrika kann gerast ein fræls og sameind tjóð.

Kappingin gongur væl hjá suðurafrikanska liðnum. Viljin at vinna er størri enn nakrantíð, og teir megna at vinna hvønn dyst. Fólk í túsundatali koma saman við Mandela til finaludystin, og hann fer sjálvur út á vøllin at heilsa upp á hvønn einstakan leikara, og øll fjøldin rópar og fagnar honum. Dysturin verður sera spennandi, og suðurafrikanska liðið vinnur at enda. Frøin er stór, og rópini og fagnaðurin fáa ongan enda, hvít og svørt hálsfevnast og frøast saman. Umsíðir hevur fólkið nakað at gleðast saman um, og tað kennist, sum Mandela og Suðurafrika saman vunnu ein stóran sigur.

Filmurin byggir á skaldsøguna Mandelas sejr eftir John Carlin.

Invictus (2009). 1 tími 48 minuttir.

Er filmurin tøkur?
Er bókin tøk?

Tú fært eitt dømi í hesum portrettfilminum, har leikstjórin fylgir fleirlistamanninum Tóroddi Poulsen. Tóroddur býr í eini íbúð í Keypmannahavn, og flestu brotini eru filmað í heiminum, sum eisini er hansara arbeiðspláss. Har yrkir hann, teknar og spælir tónleik. Huglagið í filminum er eitt sindur tungt, og ferðin ikki tann nógva, men kortini er hetta ein filmur, sum gevur tær nógv at hugsa og gleðast um.

Tú sært eina lættari síðu av Tóroddi í brotunum, har lítli sonurin er við. Tá tekur pápin sonin við inn í skapandi arbeiðið, og teir práta og tekna saman.

Tóroddur Poulsen er kultlistamaður í Føroyum, og filmurin um hann hevur eisini format til at gerast ein kultdokumentarfilmur.
Føroyski útisetin Katrin Ottarsdóttir hevur leikstjórnað, filmað og klipt.

Ein regla um dagin má vera nokk (2009). 59 minuttir + 76 minuttir av eykatilfari.

Er filmurin tøkur?

Vi ses igjen barn (Au revoir les enfants) er bygdur á barnaminni hjá leikstjóranum Louis Malle í tíðini, tá Frakland var hersett av nasistunum undir 2. heimsbardaga.
 
Høvuðspersónurin, tann 12 ára gamli Julien, ið skal ímynda Malle sjálvan, byrjar saman við fleiri øðrum jødiskum børnum at ganga í katólskum skúla undir følskum navni fyri at fjala seg. Har upplivir hann strongu upplæringina á skúlanum, men eisini vinalag við onnur børn. Men tá ein fyrrverandi lærari slatrar, verða jødisku børnini og nakrir av lærarunum handtikin av nasistunum.

Fleiri filmar eru um lívið hjá jødunum í nasistatíðini. Hesin er sermerktur á tann hátt, at hann er uttan tann stóra dramatikkin, men tess sterkari eru senurnar, ið avdúka jødahatur og líkasælu, men eisini hjálpsemi og samkenslu við teimum forfylgdu.
Ein filmur, ið hevur nakað upp á hjarta, og sum eisini vann gullleyvuna í Venesia hetta árið.

Vi ses igjen barn (1989). 1 tími 40 minuttir.

Er filmurin tøkur?

London, 1961. Jenny er 16 ár, henni dámar væl at ganga í skúla, og dreymurin hjá bæði henni og serliga foreldrunum er, at tað skal eydnast henni at koma inn á universitetið í Oxford at lesa enskt.
Ein dagin hon í oysandi regni er á veg heim frá orkesturvenjing við sínari cello, verður hon steðgað av einum manni í flottum, reyðum bili. Og nú broytist alt. David er væl eldri enn hon, sera sjarmerandi og hevur dýrar vanar. Lívið hjá Jenny fer nú í staðin fyri skúla og skúlating at snúgva seg um fínar konsertir og matstovur, vikuskiftisferðir til Oxford og Paris, sum oftast saman við vinaparinum hjá David, Helen og Danny.

David sjarmerar ikki bara Jenny, eisini foreldrini verða heilt vekk í honum og góðtaka, at Jenny og hann giftast, og at hon sostatt sleppur øll ætlanum um hægri lesnað.
Men sambandið við David fær ein bráðan enda, tá Jenny í bili hansara finnur eina rúgvu av brøvum, øll stílað til David Goldman og frú!  David sær hon ongantíð aftur, og tá hon tosar við konu hansara, skilir Jenny, at hon er ikki tann fyrsta, hann hevur havt.
Sambandið við David verður henni ein sonn læra, men við hjálp frá sínum yndislærara sleppur hon aftur í skúla og síðani eisini inn á universitetið í Oxford.
Filmurin byggir á endurminningar hjá enska journalistinum Lynn Barber, og handritið hevur kendi høvundurin Nick Hornby skrivað. Lone Scherfig hevur leikstjórnað filmin, sum hevur verið innstillaður til ein rúgvu av filmsvirðislønum og eisini vunnið fleiri av teimum, serliga fyri avrikið hjá Carey Mulligan sum Jenny.

An Education (2009). 1 tími 36 minuttir.

Er filmurin tøkur?

Fýra mannfólk fara eins og á hvørjum ári ein túr út til vatnið Jindabyne í oydnu, avstralsku náttúruni at fiska. Langt er at ganga, so teir koma ikki fram fyrr enn út á kvøldið, og tá finna teir líkið av einari ungari gentu, sum flýtur í vatninum.
Ov seint er at fara ta longu leiðina heimaftur, so teir gera av at bíða til næsta dag at melda tilburðin. Teir binda líkið fast, so tað ikki skal reka burtur um náttina.

Men næsta morgun fara teir ikki avstað kortini. Teir fara at fiska, sjálvt um líkið av gentuni flýtur nærhendis. Men hon er jú longu deyð, so teir halda ikki, tað ger mun, um teir bíða eitt sindur afturat.
Tá ið teir endiliga koma heim og melda deyðsfallið, skilja teir als ikki, at konurnar hjá teimum øsa seg um, at teir ikki varskógvaðu beinanvegin. At gentan er aborginal ger tað ikki betri, og mótstøðan ímóti teimum millum fólk bara veksur.

Under overflaten / Jindabyne (2006). 1 tími 58 minuttir.

Er filmurin tøkur?

Føroyskar søgur er heitið á hesum fangandi savni, ið er sett saman av frásagnum frá stórum og smáum gerandishendingum í Føroyum. Allar eru lýstar við einastandandi, søguligum filmsupptøkum, ið eru innsavnaðar frá søvnum og undan væðingini hjá føroyingum.

Søgurnar eru sagdar við heimildarfilmum, ið flest allir ongantíð hava verið vístir alment áður. Allir filmarnir eru kryddaðir við endurgevingum frá fólkum, ið vóru hjástødd, tá hendingarnar fóru fram, og geva harvið eina sermerkta lýsing av gerandisdegnum hjá føroyingum tey síðstu 100 árini.

Føroyskar søgur. Upplivingar úr gerandisdegnum (2009). 1. og 2. partur á tveimum fløgum.

Er Føroyskar søgur 1 tøkur?
Er Føroyskar søgur 2 tøkur?

Høvuðspersónur er countrysangarin og sangskrivarin Bad Blake. Hann hevur sæð sínar bestu dagar, drekkur illa og er vónbrotin eftir at hava livað nógv ár á vegunum. Hann hevur verið giftur fýra ferðir og eigur ein son, sum hann einki samband hevur við. Men nú ger hann eina roynd at venda gongdini. Blake sær ein møguleika, tá hann møtir journalistinum Jean, sum er einsamøll mamma. Jean fær eyga á menniskjað aftan fyri tónleikin. Men villa lívið hevur sett djúp spor, og spurningurin er, um Bad klárar at fóta sær eina ferð enn.

Tónleikafilmurin Crazy heart, sum er skrivaður og stjórnaður av Scott Cooper, er frá 2009  og byggir á eina skaldsøgu eftir Thomas Cobb um countrysangaran Hank Thompson. Sjónleikarin Jeff Bridges hevur høvuðsleiklutin sum Bad og fekk bæði ein Oscar og Golden Globe fyri besta mannliga høvuðsleiklut.

Crazy Heart (2009). 1 tími 52 minuttir.

Er filmurin tøkur?

16 ára gamla Precious, sum býr í Harlem, New York, er við barn fyri aðru ferð. Hetta er langt frá einasti trupulleikin hjá gentuni; navnið er at kalla tað einasta dýrabara í lívi hennara. Men tá lærari hennara leggur uppí og fær hana at ganga í serskúla, hómast ein glotti fyri framman. Nýggi lærarin og floksfelagarnir geva Precious hug og gleði í lívinum, hóast lívið heima við kropsligum og sálarligum harðskapi einki er broytt.

Filmurin sigur eina ræðusøgu úr einum gerandisdegi, sum kortini tykist veruligur – hetta er kanska tað mest ræðuliga. Filmurin er ein mynd av, hvussu eisini kúgað menniskju kunnu finna vón í vónloysinum.

Precious (2010). 1 tími 45 minuttir.

Er filmurin tøkur?

Bretska og amerikanska stjórnin eru í holt við at fyrireika kríggj. Men tá Simon Foster, ein minni týðandi bretskur ráðharri, úttalar seg ímóti hesum, má samskiftisleiðarin hjá stjórnini í gongd við at minka um skaðan. Samstundis eru kreftir í londunum báðum - bæði fyri og ímóti krígnum - ið royna at vinna fyrimun av óhepnu útsøgnunum hjá ráðharranum.

Í filminum verður ikki víst til hvat kríggj, talan er um, hóast tú alla tíðina hugsar um irakkríggið. Ei heldur hava hægri standandi politikarar og embætisfólk nakran leiklut, og hetta er ein styrki.
Søgan verður borin fram í høgum tempo, har tú, samstundis sum tú ógvast við grovheitirnar, sum hesi høgu fólkini nýta móti hvørjum øðrum, ikki kann lata vera við at flenna.

Undirhaldandi politisk satira av besta slag.

In the loop (2009). 1 tími 46 minuttir.

Er filmurin tøkur?

Árið er 1968. Léon er 10 ár og býr saman við foreldrunum og eldra beiggjanum, Jerome, í einum kanadiskum forstaði. Pápin er løgfrøðingur og stríðist fyri mannarættindum, meðan mamman, sum gongur heima, droymir um gera meira við síni listaligu evnir.

Léon er ikki lættur at hava við at gera, hann lýgur, stjelur, ger seg inn á grannarnar og roynir enntá at beina fyri sær. Foreldrini skeldast illa, og endin verður, at mamman rýmir til Grikkalands at liva sítt egna lív. Hetta er ein dyggur smeitur fyri Léon, sum ikki skilir, at mamman kann gera hetta ímóti teimum, og hann fer nú at gera enn meira um seg. Pápin og beiggin vilja so gjarna, at teir tríggir skulu liva eitt vanligt lív, so teir eru vónsviknir og troyttir av, at Léon gevur teimum so nógvar trupulleikar.

Men Léon er ikki bara harðligur, hann ger sær so avgjørt eisini sínar tankar um lívið - og so er tað eisini javngamla gentan Léa, sum hann gerst so hugtikin av. Hon hevur tað heldur ikki lætt heima, og saman droyma tey um at fara til Grikkalands at vitja mammu Léon. Men alt gongur ikki eftir ætlan, og hóast Léon ikki sparir seg sjálvan, so ásannar hann at enda, at hóast lívið ikki er skapt til hansara, so er hann skaptur til at liva.
Hetta er ein hugvekjandi og vakur filmur um eina viðbrekna barnasál, og filmsupptøkurnar eru eisini nakað heilt fyri seg.

Det var ikke meg! (C'est pas moi, je le jure!) (2008). 1 tími 35 min.

Er filmurin tøkur?

Wuthering Heights snýr seg um faðir- og móðurloysingin Heathcliff, sum veksur upp saman við tí vøkru Cathy á einum slotti í Yorkshire fyrst í 19. øld. Tey hava bæði sama sinnalag, og longu sum børn gerast tey góð.

Fyri at kunna vera saman leita tey sær út á tær einsligu hæddirnar í Yorkshire, men Heathcliff noyðist burtur eina tíð at vinna sær pening. Tá ið hann ríkur kemur heimaftur, hevur Cathy gift seg við tí dámliga og múgvandi grannanum, Edgar Linton. Hetta letur Heathcliff sær ikki lynda og ger, hvat hann kann fyri at hevna hesa svikagerð. Cathy doyr í barnferð, men kærleiki hansara livir víðari í demoniskum skapi, til hann sjálvur doyr. Næsta ættarlið fær viðurskiftini aftur í rættlag, so liviligt og kvirt verður aftur á Yorkshire-heiðunum.

Wuthering heights (2009). 2 tímar 15 minuttir.

Er filmurin tøkur?

Sum smágenta hittir Claire tann nakað eldri Henry, sum hevur tann serliga eginleika, at hann kann ferðast í tíð og stað – bæði aftur og fram í tíðina.
Og sum hon veksur til, gerst hon sannførd um, at hann er tann, hon skal giftast og liva saman við, hóast trupulleikan við at hann javnan, uttan ávaring, blívur burtur, tá tey eru saman.

Fleiri filmar eru, har persónar á undurfullan hátt ferðast úr eini tíð í aðra. Og tá er fyritreytin, at  áskoðarin skal kunna seta seg inn í og góðtaka hetta fyribrigdið. Og í hesum filminum eydnast tað sera væl. Fyrst og fremst tí filmurin er eitt valahandverk, høvuðsleikararnir eru sannførandi og spæla væl, og ikki minst tí høvuðstemað í veruleikanum er kærleikssambandið millum Claire og Henry heldur enn tíðarferðingin.
Ein hugtakandi og góður kærleiksfilmur.

The time traveler's wife (2009). 1 tími 47 minuttir.

Er filmurin tøkur?

Lee er ein smæðin, ung kvinna úr einari familju við stórum trupulleikum, tí pápin er alkoholikari og slær mammuna. Lee sker seg sjálva og hevur verið innløgd á psykiatriskari deild. Nú tekur hon eitt skeið í maskinskriving, so hon kann søkja arbeiði, samstundis sum hon fer at ganga saman við tí nørduta og nervaveika Peter.

Lee fær starv sum skrivstovukvinna hjá advokatinum Edward Gray. Hann er ráðaríkur og krevjandi bæði viðvíkjandi, hvussu Lee skal síggja út, og hvussu hon skal gera sítt arbeiði. Edward varnast, at hon sker seg og krevur, at hon aldrin ger tað aftur, og Lee, sum ger alt tað, hann biður um, steðgar beinanvegin. 
Ein dagin øsir Edward seg, tí Lee hevur gjørt fleiri villur í einum brævi. Hann kallar hana inn á skrivstovuna og fleingir hana. Nú tekur seg upp eitt sadomasochistiskt samband teirra millum, og Lee blomstrar upp. Verri er við Edwardi, tí hann skammast um sín seksualitet og roynir at enda sambandið.

Secretary (2004). 1 tími 44 minuttir.

Er filmurin tøkur?

Filmurin fer fram í einum stórum íbúðarhúsi í Kairo síðst í 1990'unum. Her búgva fólk úr øllum samfelagsstættum, rík og fátøk, øll við ymiskari bakgrund og lívsáskoðan. Vit hitta eina ørgrynnu av kvinnum og monnum, sum á ein ella annan hátt fáa lív síni samanflættað; tað fátæka parið, sum berjist móti órætti, konufólkarevin, sum er á veiðuferð um náttina, og mannin, sum gerst politikari fyri at fáa vald.

Stórar rembingar á tí átrúnaðarliga og politiska økinum merkja bæði fólk og samfelag. Fyri at koma sær fram mugu allar snildir brúkast, men hóast bæði mutur og dupultmoral blómar kærleikin millum fólkini í stóra íbúðarhúsinum, eisini tann forbodni.

Filmurin byggir á metsølubókina hjá Alaa Al Aswany, og hópin av teimum kendastu sjónleikarunum í Egyptalandi eru við.

Yacoubians hus (2006). 2 tímar 49 minuttir.

Er filmurin tøkur?
Er bókin tøk?

Tá eitt par kemur fram á loynilig skjøl, sum ein CIA-agentur hevur gloymt í einum fitness-sentri, síggja tey møguleikan at vinna sær pening burtur úr hesum. Men alt gongur als ikki, sum tey høvdu ætlað.

Evnið í filminum er peningagirnd, ótrúskapur og fávitska, har øll snýta hvønnannan og eingin rættiliga hevur fatur á, hvat gongur fyri seg. Men fyrst og fremst er hetta ein sera undirhaldandi og stuttlig komedia við fleiri kendum sjónleikarum.

Enn ein frálíkur filmur frá Coen-beiggjunum.

Burn after reading (2008). 1 tími 22 minuttir.

Er filmurin tøkur?

Undir 2. heimsbardaga er Christopher Foyle kriminal-kommisserur í Hastings á bretsku suðurstrondini. Hann er ein stillførur einkjumaður og eigur ein vaksnan son, Andrew, sum er jagaraflogskipari í Royal Air Force.
Trúføstu hjálparfólkini hjá Foyle eru bilførari hansara Samantha Stewart og løgreglumaðurin Paul Milner, sum er komin aftur í starv hjá løgregluni, eftir at hann varð illa løstaður á hermótinum. Tey trý hava úr at gera at uppklára morð, handil á svarta marknaðinum, stuldur og aðrar brotsgerðir.

Kríggið hevur ruðuleika og óskil við sær, og tað eru ikki so fá, sum royna at gera sær dælt av hesum, men Foyle er nærlagdur og roynir áhaldandi, at rættvísið skal vinna.

Kriminalsjef Foyle (Foyle's war). Den første sesongen (2001-2002). 4 fløgur. Er filmurin tøkur?
Kriminalsjef Foyle (Foyle's war). Den andre sesongen (2003). 4 fløgur. Er filmurin tøkur?

Daigo Kobayashi hevur verið cellistur í einum orkestri í Tokyo, men tá orkestrið verður sent til hús, er hann noyddur at finna annað arbeiði. Saman við konuni flytur hann aftur til heimbýin og fær eitt starv uttan rættiliga at vita innihaldið, men tað vísir seg, at uppgávan er at gera tey deyðu klár til jarðarferðina. Arbeiðið er ikki høgt í metum, og hann roynir at dylja, hvat hann fæst við.

Húsini hevur hann arvað frá mammuni, tey vóru einsamøll bæði, eftir at pápin var farin til eina aðra kvinnu, og beiskleikin um hetta hevur havt stóra ávirkan á hansara lív. Arbeiðið er ikki lætt at venja seg við, men tað gevur honum stóra gleði, tá tey avvarðandi eru nøgd.
Tá konan ein dagin varnast, hvat hann starvast við, rýmir hon frá honum. Tey deyðu eru órein, og hon kann ikki góðtaka starvið. Men hann gevst ikki, og einar tveir mánaðir seinni kemur konan aftur og er við barn. Hon væntar allarhelst, at hann skal gevast við arbeiðnum, men ein dagin, tá hann ger líkið av einari kvinnu, tey bæði kenna, til reiðar, sær hon tann kærleika og ta virðing, hann leggur í arbeiðið, og góðtekur støðuna. Ein dagin fær Daigo bræv um, at pápi hansara, sum hann ikki hevur sæð, síðan hann rýmdi, er deyður. Hann er í tvístøðu, men konan fær hann at fara til staðið, har pápin búði, og nú sættast hann at enda við fortíðina.

Filmurin fekk í 2009 Oscarvirðislønina fyri besta útlendska film.

Departures (Okuribito) (2008). 2 tímar 8 minuttir.

Er filmurin tøkur?