Karitas uden titel er ein dramatisk lagnusøga um eina íslendska kvinnu í byrjanini av 1900-talinum.
Karitas er yngst av fimm systkjum, tveir beiggjar og tríggjar systrar. Mamman er einsamøll við børnunum, eftir at pápin gekk burtur á havinum.

Hægsta ynski hjá mammuni er, at øll børnini skulu fáa eina útbúgving, og hon ger av at flyta til Akureyrar, har møguleikarnir fyri skúlagongd eru betri. Hetta krevur nógv stríð og hart arbeiði, men tey eru treisk, og tað eydnast teimum øllum at fáa eina útbúgving.
Karitas hevur sera góð listarlig evnir, hon sleppur inn á Det Kgl. Danske Kunstakademi í Keypmannahavn og fær útbúgving sum myndlistakvinna. Hon flytir heim aftur til Íslands og hittir Sigmar, sum hon fær fleiri børn við. Hann er fiskimaður og burtur tað mesta av árinum. Karitas kennir seg sera einsamalla og gloymda, og stundir eru ikki til mála, tað var fyrr drívmegin í lívi hennara.

Karitas uden titel er fyrra bók av tveimum um Karitas og lív hennara.

Karitas uden titel (2007). 456 síður.
Karitas - kaos på lærred (2008). 548 síður.

Clara, sum er djóralækni í einari enskari bygd, verður ein morgun tíðliga vakt av telefonini. Ein nábúgvi er heilt frá sær sjálvum og biður hana koma, tí ein slanga liggur í vøgguni hjá pinkubarninum. Men hetta er bara tann fyrsta slangan. Skjótt verður innrás í fleiri húsum í bygdini, tað yður bæði av snákum, høggormum og øðrum slangum, sum vanliga ikki liva í Onglandi, og skjótt verður eisini fyrsta líkið funnið, slangueitur er deyðsorsøkin.

Clara er vanliga rættiliga afturhaldandi, men nú noyðist hon at samarbeiða við bæði varapolitimeistaran og ein kendan reptil-serfrøðing, og skjótt eru tey vavd inn í eitt mál við loynidómum, sum ganga langt aftur í tíðina.

S. J. Bolton: Slangehuset (2009). 400 síður.

Væl umtókti føroyski detektivurin, Hannis Martinsson, er aftur á ferð í nýggju krimibókini Norðlýsi.
Føroya nývaldi, kvinnuligi løgmaður verður skotin, tá ið hon skal tendra jólatræið á Vaglinum, og stutt eftir verða tvey fólk brend inni umborð á einum báti á Vestaruvág.

Hannis arbeiðir aftur á Blaðnum niðri í Vágsbotni og fer undir at kanna, um tað er ein samanhangur, og um illvilji ímóti samkyndum hevur nakran leiklut. Um sama mundið skal veðurlagsfundur vera í Norðurlandahúsinum, undanfundur til ta stóru stevnuna í Keypmannahavn, og her eru væntandi nógv stór altjóða nøvn. Hetta eru gyltir dagar fyri tíðindafólk sum Hannis Martinsson.

Bókin er 6. partur av raðnum um Hannis Martinsson.

Jógvan Isaksen: Norðlýsi (2009). 290 síður.

Ingrid er ein 48 ára gomul karrierukvinna, fráskild og einlig mamma. Hon hevur samband við ein giftan mann, sum er 20 ár eldri enn hon, men tað gongur ikki so væl teirra millum.

Ein dagin, meðan hon er stødd uttanlands, eru boð eftir henni, tí sonurin er tikin fyri harðskap. Næstu dagarnir fara við nógvari sjálvrannsakan. Hvør er orsøkin til, at sambandið við sonin er so vánaligt, hví er hann komin í hóslag við smákriminellar dreingir, og hví skal so lítið til, at tilvera hennara, sum sýntist at vera so góð, nú er um at rapa? Og hvar kann hon finna svarið, er tað í sínum egna uppvøkstri ella kanska í uppvøkstrinum hjá mammuni? Og hvussu kemur hon víðari?
 
Jens Christian Grøndahl: Fire dage i marts (2009). 332 síður.

Árið er 1957, tá ungi Lewis Aldrigde, aftaná at hava sitið eitt ár í fongsli, kemur aftur til heimbygdina. Hann skal nú royna at koma til sættis aftur við bygdarfólkið og við seg sjálvan. Men álitið, bygdarfólkið hevur á honum, er ikki tað stóra, og sjálvur ger hann tað ikki lættari við sínum ofta løgna atburði.

Trupulleikin er, at eingin fatar, at orsøkin til atburð hansara er tann sorg og saknur, hann framvegis kennir, eftir at hann sum 10 ára gamal upplivdi, at mamman druknaði.

Hetta er ein vælskrivað og hugtakandi søga, um hvørja ávirkan tað hevur, tá tey vaksnu ikki skilja sorgina og saknin hjá einum barni, men royna at tiga alt burtur. Men bókin er eisini ein lívsjáttandi kærleikssøga.

Sadie Jones: Den udstødte (2009). 396 síður.

Frank McCourt gjørdist heimskendur, tá hann í 1996 gav út bókina Angela's ashes (Angelas aske), og í 1999 kom framhaldið 'Tis (Lykkens land). Hetta eru hugtakandi skaldsøgur um fátæksligan og truplan barndóm og ungdóm í Írlandi og USA. Í 2005 kom so seinasta bókin í raðnum, Teacher man (Hr. Lærer), men hendan bókin er kanska ikki so kend sum hinar báðar. Hóast bøkurnar eru skaldsøgur, so byggja tær á lívið hjá høvundanum.

Í Teacher Man sigur McCourt frá sínum lívsstarvi sum lærari á ymsum studentaskúlum í New York. Byrjanin er trupul, men hann gevst ikki, hóast avbjóðingarnar eru nógvar, bæði frá næmingunum og umstøðunum annars. Á sín sermerkta hjartanemandi og humoristiska hátt sigur høvundurin frá sínum sigrum og ósigrum. Eisini fáa vit at vita, hvussu tað bar til, at hann fór at skriva skaldsøgurnar, sum heilt óvæntað fingu so góða móttøku.

McCourt, Frank: Teacher man (2005). 258 síður.

Bókasavnið hevur bókaraðið bæði á enskum og donskum
og sum ljóðbøkur á donskum.

Til tey, sum leita eftir einari nýggjari, góðari krimi.
Judith er garvaður kriminalkommiserur, men hon er langt niðri, tí makkarin hjá henni varð dripin, tá hann tók eina vakt fyri hana. Søgan byrjar 2 ár eftir drápið, og Judith er um at missa bæði sjeik og starv vegna tunglyndi.

Judith og nýggi, ungi makkarin, Manni, fáa ein sak í stóra skógarøkinum rundan um Köln, har ein maður verður funnin deyður í einum veiðitorni. Tætt við er ein buddistiskur skeiðsdepil, har nógv undarlig fólk halda til, og ein ungur og bangin kvinniligur skógarfúti hevur eisini sín part í spælinum.

Gisa Klönne: Skoven er tavs (2008). 376 síður.

Ein ungur, dugnaligur løgreglumaður kannar í 1950’unum eitt sjálvmorð og kemur í hesum sambandi fram á loynidómar um høvuðspersónin, eitt matematiskt geni, sum undir 2. heimsbardaga var heilin aftan fyri at avkoda týsku Enigma-skipanina.

Talan er um Alan Turing (1912 -1954), sum eisini verður roknaður sum tann, ið kom við teoretiska grundarlagnum fyri teldutøkni, sum vit kenna hana í dag. Trupulleiki hansara var tó, at hann var samkyndur, og í Onglandi var tað um hetta mundið framvegis roknað sum kriminelt. Hann varð dømdur og fekk harða revsing, og hetta var helst orsøkin til, at hann tók lívið av sær.

Bókin er at síggja til ein krimi, men heldur er hetta ein spennandi og hugtakandi lýsing av einum áhugaverdum persóni.

David Lagercrantz: Syndefaldet i Wilmslow (2009). 398 síður.

Úti í oyðuni í Himalaya á markinum til Nepal býr ein fólkaskýggjandi indiskur dómari saman við abbadóttrini, Sai, sum misti foreldrini í eini ferðsluvanlukku. Í húsinum býr eisini kokkurin, sum gongur og bíðar eftir at frætta nýtt frá soninum, sum býr ólógliga í New York. Tey liva eitt friðarligt lív

Dómarin, ið er ávirkaður av hjálandamentan, minnist aftur á einslig og eyðmýkjandi lestrarár í London, eitt ólukkuligt hjúnalag og kensluna av at vera fremmandur í sínum arbeiði sum dómari. Ófriður er í økinum, nepalesarar gera uppreistur, og tá Sai verður góð við læraran hjá sær, sum heldur við uppreistrarmonnunum, órógvar tað teirra einfalda lív á fjallinum. Fremmandagerð og fordómar hjá bæði bretum og indarum verða lýst.

Kiran Desai fekk í 2006 Man Booker prize fyri bókina.

Kiran Desai: Det tabte land (2007). 429 síður.

Í skaldsøguni Revolution eftir Jacob Ejersbo eru 9 søgur við hvør sínum høvuðspersóni, ið allir hava tilknýti til Moshi í Tanzania.
Felags fyri fleiri av persónunum er eisini, at teir kenna seg ikki heima, har teir eru. Fleiri teirra eru uppvaksin við fleiri mentanum og líða undir hesum, uttan mun til um orsøkin er teirra átrúnaðarligi ella tjóðskaparligi uppruni.

Fyrsta søgan byrjar í Norðurgrønlandi og fer umvegis Keypmannahavn til Afrika Síðani eru fleiri søgur úr Afrika og ímóti endanum ein úr Finnlandi og ein úr USA.

Søgurnar eru ótrúliga væl skrivaðar, tú fært kensluna av, at rithøvundin má hava kent høvuðspersónarnar fyri at kunna greiða frá teirra lagnum.
Har er søgan um eina unga gentu, ið fer inn til býin at arbeiða í trúgv upp á eina betri framtíð, men sum endar við at noyðast at selja seg sjálva fyri at yvirliva. Har er søgan úr námunum, ein sera ómenniskjalig tilvera, sum so kanska ger, at atburðurin hjá hesum menniskjum er rættiliga ómenniskjaligur, og fleiri aðrar, ið tú sum lesari verður rørdur av.

Revolution er annar partur av trilogi hjá Jakob Ejersbo, men kann væl lesast sum sjálvstøðug bók.

Jakob Ejersbo: Revolution (2009). 302 síður.

Bernie Gunther, ið fyri kríggið var kriminalinspektørur í Berlin og nú er ein heldur ivasamur privatdetektivur, endar í 1950’unum í Argentina, hagar nasistar í túsundatali eru flýggjaðir.
Her skal hann hjálpa politinum at uppklára eitt morð, sum minnir um okkurt, hann kennir frá sínum arbeiði í Týsklandi.

En stille ild er 5. bind í røðini Berlin noir, sum skotski Philip Kerr hevur skrivað um týska privatdetektivin. Tað er ein fragd at fylgja freka og hittinorðaða Gunther í hesi effektivu spenningssøguni, sum eins og hinar bøkurnar í røðini er ein góð lýsing av avskeplaðu menniskjafatanini hjá nasistunum.

Philip Kerr: En stille ild (2009). 405 síður.

Bókin fer fram mitt í 1800-talinum í Nýsælandi, har gullfepurin herjar.
Harriet og Joseph eru nýgift og eru saman við mammu hansara komin úr Onglandi at royna eydnuna. Dreymurin um ríkidømi er tó ikki so lættur at náa. Tey hørðu livikorini í tí kørgu náttúruni og tyngjandi loynidómar úr fortíðini fáa hjúnabandið at ridla, og lívið hjá teimum trimum lagar seg heilt øðrvísi enn væntað.

Umframt áhugaverdu persónslýsingarnar av Harriet og Joseph, so gevur skaldsøgan eisini eina breiða mynd av Nýsælandi um hetta mundið. Landið er merkt av mongu innflytarunum og gullgravarunum, men vit hoyra eisini um upprunafólkið, maoriarnar, og um teirra siðir og skikkir.

Tremain, Rose: Guld (2004). 423 síður.
Bókasavnið hevur eisini bókina á enskum: The colour (2003). 368 síður.

Hevur tú lisið allar Twilight-bøkurnar og ikki fingið nokk av vampyrum og varúlvum enn, so eru bøkurnar um Clary í raðnum "Dødens instrumenter" verdar at royna.

Clary er 15 ár og býr í New York. Á einum diskoteki er hon vitni til eitt morð, men hon uppdagar, at tað bara er hon, sum sær tað. Skjótt varnast hon, at hon sær ymiskt, sum er ósjónligt hjá øðrum, m.a. varúlvar, vampyrar og demonir. Til alla lukku hevur hon sín trúfasta vin, Simon, sum stuðlar og hjálpir henni. Hann er eisini so friðarligur og vandaleysur í mun til Jace, sum kann vera í so ræðandi.

Cassandra Clare:
Dæmonernes by (2008). 448 síður.
Den tavse by (2009). 403 síður.

Matti er 40 ár og heimagangandi. Konan er júst farin frá honum og hevur tikið dóttrina við. Hann stendur einsamallur eftir og skilir einki, men nú fer hann at stríðast fyri at fáa konuna aftur. Hann hoyrdi hana einaferð tosa um egin hús, og nú sær hann tað sum einasta møguleika at savna familjuna aftur.

Hann byrjar at renna og rennur runt í øllum grannaløgunum nærhendis og ger sínar eygleiðingar, og so fer hann undir at massera, fyrst ítróttafólki og seinni eisini kvinnum, alt fyri at fáa pengar til húsini. Hann letur einki forða sær, og í kríggi og kærleika er alt loyvt.
 
Bókin, sum fekk Nordisk Råds Litteraturpris í 2004, gevur eina ironiska mynd av tí bleyta manninum, men ódámligur er hann ikki.
 
Kari Hotakainen: Á heima-vígvøllinum (2005). 297 síður.
Á donskum: Hjemmefronten (2004). 296 síður.

Omma Viktoriu er á ellisheimi, og ein dagin hoyrir Viktoria nakað, sum fær hana at óttast, at omman er sjúk og skjótt fer at doyggja. Hon og vinkonan Oda gera av, at omman skal hava seinasta ynski sítt uppfylt, men so er bara at vita, hvat omman ynskir sær allarmest í verðini.

Omman finnur ikki tað gamla smúkkuskrínið, skrínið við øllum minnunum. Tíbetur hevur Victoria vinkonu sína Odu at hjálpa sær, og í smúkkuskríninum, sigur omman, fjalir seg okkurt, sum kann broyta alt.

Eisini pinkumaðurin Pinki er við,  men hann er so forliptur, at hann fær ikki hugsað um annað enn Nanny, og tó eru Pinki og Nanny so ymisk, sum pingilipongar kunnu vera.

Bókin er 3. partur av bókaraðnum, sum eisini telur Hvør fjalir seg í postkassanum? og Hvør fjalir seg í ferðataskuni?

Marjun Syderbø Kjelnæs : Hvør fjalir seg í smúkkuskríninum? (2009). 80 síður.
Myndprýtt hevur Hanni Bjartalíð

Tilvildin vil, at fýra einsamøll menniskju møtast í París.
Camille er ein ung listakvinna, sum er troytt av mótgangi og lívinum yvirhøvur. Philibert er av aðalsætt, býr í einari risastórari íbúð og vil helst vera fyri seg sjálvan. Paulette er ein eldri kona, ið hevur trupulleikar við at klára seg einsamalla, men sum ikki vil á ellisheim,  og so er tað ommusonur hennara Franck, sum er kokkur á eini fínari matstovu og eitt satt arbeiðsgrev.

Tey eru øll ógvuliga ymisk, liva sera ymisk lív og sýnast ikki at hava nakað í felag, tó hava tey øll eina fortíð, ið forðar teimum í at koma víðari í lívinum.
Rithøvundin er fronsk, og hon gjørdist kend uttan fyri Frakland við hesi bókini, sum eisini er filmatiserað.

Anna Gavalda: Bare sammen (2004). 552 síður.

Ein 70 ára gamal maður, ateistur um ein háls, vaknar á sjúkrahúsinum eftir eina heilabløðing. Teir liggja tríggir gamlir stavnar á stovuni, men hann er tann frískasti. Deildarsjúkrasystirin við sínum kvinnuligu formum fær hann at hugsa um konuna, sum nýliga er deyð og alt, hann nú er noyddur at uppgeva.

Einasti sonurin Pekka er farin til Sankta Pætursborg, har hann arbeiðir som forgyllari í Isaak-dómkirkjuni. Hann er blivin kristin, og pápin ger nú av at fara til Sankta Pætursborg at royna at fáa hann at hálsa um og bøta um sambandið teirra millum.
 
Stórir spurningar verða tiknir upp í søguni, trúgv og vantrúgv, lív og deyði, men tað er gjørt væl og skemtiliga.
 
Kari Hotakainen: Isaak-katedralen (2006). 144 síður.

Kristin Lavransdatter er ein trilogi (Kransen, Husfrue, Korset), sum kom út á fyrsta sinni í 1920-22. Hetta man vera kendasta bókmentaverkið hjá Sigrid Undset, sum fekk Bókmentaheiðursløn Nobels í 1928, serliga fyri sínar lýsingar av Noregi í miðøldini.

Kristin er stórbóndadóttir, stolt og treisk, og hon giftist móti vilja faðirsins við Erlendi, og tey fáa sjey synir. Hon hevur frá barnsbeini av kent seg drigna bæði at verðsligari fáfongd og Guds kærleika. Kristin fær ringa samvitsku av gerðum sínum, og hjúnalagið verður ikki lukkuligt. Lív hennara er mangan baldrut, og at enda fer hon eina pílagrímsferð til Niðarósa við tí í hyggju at gerast nunna, men doyr av svartadeyða.

Sálarfrøðiliga lýsingin av Kristini er framúrskarandi, og harumframt fáa vit eisini eina siðsøguliga mynd av Noregi í 14. øld.

Sigrid Undset: Kristin Lavransdatter (2005). 906 síður (3 bind í einum).
Bókasavnið hevur eisini bøkurnar á norskum

Pi er ein 16 ára gamal indiskur drongur. Hann er trúgvandi, men tekur undir við bæði kristindómi, hinduismu og islam uttan at velja eina ávísa religión.
Familjan hjá Pi rekur ein djóragarð, sum tey gera av at flyta til Kanada. Øll fara avstað við skipi, bæði djór og fólk, men skipið søkkur, og bert Pi kemur livandi frá tí saman við nøkrum av djórunum.

Pi og djórini reka í einum bjargingarbáti ímóti Amerika, men vælvaksni tikarin, nevndur Richard Parker, etur hini djórini eitt fyri og annað eftir. At enda eru bara Pi og tikarin eftir, men tá teir eftir langa tíð koma í land, er ilt at fáa greiðu á, hvat tað var, sum hendi

Yann Martell: Pi’s liv (2003). 324 síður.

Bókasavnið hevur eisini bókina á enskum: Life of Pi (2002). 319 síður.

Tveir irakiskir menn í útlegd, Robban og Bahaa, hittast tilvildarliga á einari kafe í einum lítlum býi í Marokko. Teir gerast vinmenn, og saman minnast teir aftur á farnar dagar í Bagdad. Báðir eru teir flýddir undan harðrenda stýrinum hjá Saddam Hussein, og ógvusligar og harðligar hendingar hesa tíðina hava merkt teir fyri lívið

Vit fáa eisini søguna um Robban og hansara loyniliga kærleika til dansarinnuna Saifu, og um pápa hansara, sum selur sínar ognir, fyri at sonurin kann flýggja. Bahaa roynir at finna kærleikan í Marokko, men tað fær álvarsligar avleiðingar fyri ta ungu kvinnuna, hann hittir.

Muniam Alfaker: Mindernes trapez (2007). 188 síður.